Paškinje su snalažljive persone, tako mi je došla uglavu jedna štorija ko se ni dogodila. Ali da se je i dogodila, ne bi puno drugcija bila od ovoga scenarija.

Opće je poznato da se za često uporabljive riječi, koriste zamjenske skraćenice. Pa tako u ovom slučaju pogrebno poduzeće, za tisak na lentu đerlande koristi besede: „Posljednji pozdrav“, pa je usvojena poslovna skraćenica PP…. (u nastavku tekst ožalošćenog). E odovud gre caratanija.

Dolazi paškinja narucit đerlandu za susedinoga pokojnjaka:

• Dobar dan šjor, ja bi morala narucit jednu đerlandu.

• Može, kakvu veću-manju, samostojeću, posebnu, ….

• Ma ne bi ja šparinjala…. Napravite mi cakod velo, ali da ni pre škupo, jerbo penšja je mala, a muž nima više niš na banku, a doplatak su odavna ukinuli….

• U redu idem ja u skladište pogledat, a vi ispunite formular za tisak na lentu…

• Oću, samo da oćali stavin. Da vidimo…. Ime …..Ante, prezime…..neznan, vrsta đerlande ….. pocekat ću…. A ca je vo? …..u nastavku tekst pa PP

• A niš, ajmo vako, prekrižin PP i pišen….. Puno Pozdrava od tvoje susede Marice, i pozdravi mi gori svih ki me poznivaju, i ako vidiš Jelicu, onu ca je umrla prija 2 godišća pitaj je di je kumulu za kafu klala jerbo ovako moran kuvat u dva put kad mi niki dojde. Ala bog!